08-31-08
|
Nga 400 studentë që kanë përfunduar ciklin e parë të studimeve në Korçë, vetëm 100 prej tyre do të kenë fatin të vazhdojnë studimet për master. Do të jenë kriteret e vendosura ato që do të përcaktojnë përzgjedhjen e kandidaturave. Si kriter bazë do të merret nota mesatare, intervista dhe cilësia e saj, por ndërkohë do të ketë edhe kritere të tjera. Në këtë program do të marrin pjesë studentët që kanë përfunduar studimet për Gjuhë-Letërsi, Shkencat Sociale, Gjuhën Angleze si dhe ata të Fakultetit të Matematikës.
Ndërkohë studentet e Fakultetit të Bujqësisë do të vijojnë me diplomën e nivelit të dytë. Në këtë program, pjesëmarrës do të jenë studentët që kanë mbaruar për Hortikulturë dhe Agro-ushqim.
Jashtë këtij programi do të mbeten vetëm studentët që kanë përfunduar ciklin e ulët dhe atë parashkollor, të cilët duke mbyllur ciklin e studimeve me 3 vjet do të mbeten kontingjent për kopshtet dhe ciklin e ulët të arsimit 9-vjeçar.
Gjithçka është bërë e ditur nga zëvendësrektori i universitetit “Fan S. Noli” në Korçë, prof. dr. Ali Jashari.
“Realizimi i këtij programi do të zhvillohet ditën në sistemin me kohë të plotë. Gjithë studentët që do të vazhdojnë për mastër dhe diplomën e nivelit të dytë do të gjejnë mjedise të përshtatshme, auditorë, klasa të specializuara, biblioteka të posaçme për master, sallë me kompjuterë dhe mjete audio-vizive, të cilat do të shërbejnë për mësimdhënie”, tha prof. dr. Ali Jashari.
Në vijim të këtij informacioni Jashari bëri të ditur se, “Aplikimi për ciklin e dytë të studimeve, sipas Deklaratës së Bolonjës, nis për herë të parë gjatë vitit akademik 2008-2009, pasi një vit më pare përfundoi cikli i parë i studimeve në nivelin 3-vjeçar”.
Megjithatë, sistemi i Bolonjës 3+1 për Mësuesinë dhe 3+2 për Bujqësinë nuk do të thotë që do të përfshijë të gjithë studentët. Programi studimor master në nivelin e parë Mësuesi ka një kuotë të caktuar të pranimeve që nga ana e universitetit është propozuar deri në 100 kandidatura, të cilat do të përfshijnë degët e cituara më sipër, (Gjuhë-Letërsi, Shkencat Sociale, Gjuha Angleze dhe Matematika). |
