. Për herë të parë, ajo do të interpretojë në një monodramë. E titulluar "Velloja e bardhë", shkruar nga Odise Plaku, Zamira Kita do të shfaqet para publikut me një tjetër karakter. "Velloja e bardhë" do të ngjitet në skenën e teatrit "Çajupi" në Korçë, në fund të muajit tetor. Zamira Kita e ka vlerësuar rolin që do të interpretojë, si të niveleve të larta artistike, ndërsa thotë se pjesa që do të shfaqet në skenën korçare përshtatet shumë me realitetin shqiptar. Monodrama e shkruar prej autorit Odise Plaku ka angazhuar në rolin e një prostitute aktoren korçare. Interpretimi i Zamira Kitës dhe profesionalizmi i aktrimit pritet të bëjë për vete publikun në një vepër e cila do të përcjellë dramën e madhe të jetës së një gruaje që është e detyruar të shesë trupin për të mbajtur gjallë familjen. "Velloja e bardhë" do të vihet në skenë nga regjisori Marko Bitraku. Së bashku me aktoren, por edhe vetë autorin, regjisori po përpiqet që të ngjisë në skenë një monodramë, e cila të mbetet në kujtesën e publikut për nga realizimi skenik, përmbajtja dhe aktrimi. "Kjo monodramë ka shumë emocione të forta", shprehet Zamira Kita. Aktorja, e cila për të parën herë gjatë karrierës së saj do të interpretojë një monodramë, synon që të vijë suksesshëm para publikut të shtëpisë, edhe për faktin se kjo pjesë, sipas saj kërkon një pjekuri të lartë artistike. Përmbajtja dhe trajtimi që autori i ka bërë dramës që përjeton kjo grua, ngjall emocione të cilat Zamira Kita dëshiron t‘i përcjellë me po të njëjtën forcë përpara publikut. "Autori nuk e përligj fenomenin. Bëhet fjalë për një dramë të cilën e gjen në realitetit shqiptar. Një grua e detyruar nga kushtet e vështira ekonomike, nga papunësia e saj dhe e bashkëshortit, nga fakti se fëmijët qajnë për bukë nga uria, nga fakti se prindërit janë të sëmurë, merr përsipër të shesë trupin për të mbajtur peshën e rëndë të familjes. Mua më ngacmoi shumë monodrama e Odise Plakut, një monodramë plot ndjenja të forta që i përjeton që në momentet e para. Kam pasur shumë dëshirë të interpretoj një monodramë dhe tani them se ka ardhur koha e duhur që me autorin Plaku të ngjitem në skenë në një interpretim të tillë, që në fakt kërkon pjekuri profesionale artistike. Historia e kësaj gruaje që përfundon në mënyrë tragjike është e dhimbshme dhe shpresoj se emocionet që kam përjetuar kur lexova për herë të parë këtë monodramë të mund t‘ia përcjell publikut me të njëjtën forcë", thotë Zamira Kita. Monodrama "Velloja e Bardhë" do të shfaqet këtë muaj për të tërhequr edhe interesin e spektatorëve, por edhe për t‘iu shtuar emocionet nga një interpretim artistik në skenë. Autori ia ka besuar këtë rol në Korçë një prej aktoreve të mirënjohura që pritet të sjellë edhe suksesin e kësaj pjesë.
gazeta shqip
