10-19-08
Komisioni Evropian do të lëvrojë 300 mijë euro për turizmin, vlerat kulturore të fshatit turistik të Voskopojës, por edhe për zhvillimin e bujqësisë në këtë zonë. Projekti do të vihet në zbatim nga dy shoqata “Trashëgimi pa kufi”, ku njëra është franceze dhe tjetra serbe. Ky projekt, që sapo ka startuar, do të shtrihet në një hark kohor prej 5 vitesh, çka do të thotë se ai do të përfundojë në vitin 2013, pasi nuk bëhet fjalë vetëm për fshatin Voskopojë, por edhe për fshatrat e tjera të kësaj komune. Ndërkohë, Komuniteti Evropian do të vërë në dispozicion të fshatit Voskopojë edhe 100 mijë euro të tjera, në shërbim të shtrimit të rrugëve të brendshme të këtij fshati, për të cilat është parashikuar që të shtrohen me kalldrëm, me qëllimin e vetëm kthimin në identitet të tyre. Vënia në zbatim e këtij projekti është bërë e ditur nga kryetari i komunës Voskopojë, Nexhip Baçelli, i cili ka sqaruar se dy shoqatat “Trashëgimi pa kufi”, kishin hartuar një plan veprimi për zhvillimin turistik të Voskopojës dhe gjithë zonës përreth saj, ku përfshihej jo vetëm mirëmbajtja e vlerave kulturore, por edhe zhvillimi i bujqësisë, e cila do të jetë në mbështetje të vlerave turistike.
Gjithsesi, me gjetjen e fondeve, dy shoqatat tashmë kanë nisur të konkretizojnë projektin në fjalë. Për ndjekjen e zbatimit të këtij programi, aktualisht janë vendosur disa punonjës, të cilët do të shohin nga afër mirëpërdorimin e fondeve.
Por jo vetëm kaq, për herë të parë, do të financohet edhe për zhvillimin e bujqësisë së kësaj zone. Në fshatin Gjonomadh të kësaj komune do të mbështet me fonde mbjellja e 7000-8000 fidanëve me kumbulla.
Meqenëse ky projekt do të ketë një vijueshmëri për 5 vjet me radhë është parashikuar që ndihmesa të jepet edhe për fshatra të tjera, me qëllim rritjen e mirëqenies së tyre, por në të njëjtën kohë edhe për t’i ardhur në ndihmë zhvillimit të turizmit në Voskopojë.
Dy shoqatat kanë hartuar edhe një plan për gjelbërimin e vetë Voskopojës, gjelbërim ky që i ka munguar këtij fshati prej kohësh. Ky projekt mbetet nga më të rëndësishmit për Voskopojën, pasi, ndërsa është bërë shumë për ndriçimin dhe rregullimin e mjediseve të jashtme, nuk është arritur që të kemi rrugë të brendshme të rregullta dhe aq më pak siç kanë qenë të shtruara dikur me gurë. Projekti ka parashikuar edhe ngritjen e një qendre informative turistike, e cila do t’u vijë në ndihmë vizitorëve të ardhur nga rrethe të tjera, por veçanërisht turistëve që vijnë nga vende të ndryshme të botës.
“Përfundimisht, tha Bacelli, mund të them se numri i vizitorëve dhe turistëve gjatë viteve të fundit ka ardhur duke u rritur, ndërsa për këtë vit mendojmë se numri i mysafirëve do të jetë shumë më i lartë. E them këtë, sepse edhe në momentin që flasim, vizitorët nuk ka kanë munguar”.
Projekti përfshin Dardhën, Vithkuqin, Voskopojën, Liqenasin etj.
Agjencia holandeze për zhvillim, ndihma për turizmin liqenor e malor
Vithkuqi, Dardha, Voskopoja, por edhe fshatrat e tjera turistike të rretheve Kolonjë, Devoll, Korçë dhe Pogradec kanë gjetur mbështetjen e Agjencisë Holandeze për Zhvillim (SNV). Kjo ka si qëllim forcimin e kapaciteteve të organizatave lokale, me synim reduktimin e varfërisë dhe përmirësimin e qeverisjes nëpërmjet rritjes së kapaciteteve. Kjo agjenci do të punojë për hartimin e planit të veprimit për zhvillimin e turizmit malor.
Agjencia ka dhënë ndihmesën e vet që dy vjet më parë në hartimin e një programi për zhvillimin e turizmit në fshatin turistik Rehovë në rrethin e Kolonjës.
Mbështetja e ofruar nga Agjencia Holandeze për Zhvillim është bërë e ditur nga kryetari i Këshillit të Qarkut Korçë, Ilia Milo, i cili ka preferuar ta bëjë publik këtë bashkëpunim, vetëm pas shumë negociatash të realizuara mes SNV dhe Këshillit të Qarkut Korçë, të cilat kanë përfunduar me një marrëveshje bashkëpunimi për hartimin e planit të veprimit në zhvillimin e turizmit malor në rajonin e Korçës. Këtë deklaratë Milo e ka bërë gjatë një takimi ku ishin të pranishëm përfaqësues të SNV, agjencive turistike, përfaqësuesve të pushtetit lokal të qarkut Korçë.
Në vijim të fjalës së tij, Milo ka vënë në dukje faktin se zhvillimi i turizmit malor mbetet prioritar në politikat e Këshillit të Qarkut Korçë, ku tashmë zhvillimit të turizmit do t’i jepet një nxitje tjetër edhe më e fuqishme.
Sipas Milos, “vizioni i Këshillit të Qarkut Korçë ka qenë dhe mbetet që ky qark të ketë për destinacion turizmin, të jetë i aftë në tregun turistik të brendshëm, por edhe atë ndërkombëtar, çka do të thotë se tërheqja e turistëve do të bëhet edhe më efektive pas vënies në zbatim të këtij programi, i cili do të bëjë të mundur shfrytëzimin e të gjitha kapaciteteve turistike të këtij rajoni. Hartimi i planit të veprimit për zhvillimin e turizmit, tha më tej Milo, do të sjellë ndryshime pozitive në mënyrën e jetesës së banorëve, veçanërisht në fshatrat turistike, ku vetëm nga bashkëpunimi turist-banor do të mundet të krijohet një imazh pozitiv për rajonin”.
Lidhur me këtë çështje, kryetari i Këshillit të Qarkut Korçë, Ilia Milo, ka shpjeguar se ky program do të përfshijë jo vetëm fshatra të tilla si Vithkuqi, Dardha, Voskopoja dhe Liqenasi, por edhe një sërë fshatrash të tjera të këtij qarku, ku mund të përfshihen të katër rrethet e rajonit.
Nga ana e vet, Agjencia Holandeze për Zhvillim (SNV) ka sqaruar se kjo agjenci është duke punuar për hartimin e planit të veprimit për zhvillimin e turizmit në qarkun e Korçës. “Ne, u shprehën përfaqësuesit e SNV, mbështesim iniciativat lokale për formalizimin e tyre”.
Kryetari i Këshillit të Qarkut Korçë, Ila Milo, ndërsa ka siguruar të pranishmit se ky bashkëpunim tashmë ka nisur udhën e vet, ka kërkuar nga drejtuesit e qeverisjes vendore, impenjim maksimal në realizimin me sukses të këtij projekti kaq të rëndësishëm për qarkun e Korçës.
V. Hasani
|
