11-02-08
Gropat, pluhuri në ditët e thata, e balta në mot me shi, janë pjesë shoqëruese e përhershme e pasagjerëve. Drejtuesit e mjeteve ankohen për një situatë të tillë e jo më pak se ata edhe pasagjerët. Rruga vijon të jetë problematike dhe jo rrallë herë në këtë segment janë bërë aksidente të rënda me pasojë vdekjen e qytetarëve. Prej disa kohësh, për shkak të motit të keq, punimet në këtë segment ishin tepër të ngadalta. Por ritmet e punimeve në superstradën Korçë-Qafë Plloçë pësuan ndryshime ditët e fundit, favorizuar edhe nga kushtet e mira atmosferike. Në lotin e pestë të këtij segmenti të rëndësishëm ka nisur faza e dytë e asfaltit. Firmat e ndërtimit po përshpejtojnë punimet edhe për shkak të kritikave të shumta mediatike për ritme të ngadalta. Të 13 firmat ndërtuese të këtij aksi po shfrytëzojnë faktin, se prej gati dy javësh nuk janë shënuar reshje shiu. Punimet kanë finalizuar edhe ndërtimin e disa veprave që përfshihen në projekt, siç janë ura apo mbikalime. Burime nga Drejtoria e Rrugëve në Korçë bëjnë të ditur se ndërtuesit e lotit të pestë kanë avancuar në punime. Në këtë aks të superstradës me gjatësi rreth 5 kilometra, punojnë tri firma ndërtuese të Korçës "Simaku", "Vashtëmia" dhe "Xhengo". Ato operojnë në pjesën fundore të aksit të përfshirë në këtë projekt, në zonën e Çëravës. Mësohet se në lotin e pestë kanë përfunduar dy vepra të rëndësishme, ura e Lumit të Leshnicës, 52 metra e gjatë dhe mbikalimi i Çëravës, 17 metra i gjatë. Drejtuesit e firmave ndërtuese të lotit të pestë u shprehën se kanë përfunduar shtrimin e shtresës së parë të asfaltit dhe dje filloi shtrimi i shtresës së dytë. Inxhinieri Olsi Voka, tha se krahas ritmeve të shpejta të punës, vëmendje parësore po i kushtohet kryerjes së ndërtimeve me cilësi të lartë teknike. Mësohet se moti i mirë po shfrytëzohet maksimalisht edhe nga firmat ndërtuese në lotet e tjera të superstradës. Tashmë janë gati në përfundim disa vepra, ndërkohë që në një pjesë të mirë të superstradës është hedhur shtresa e parë e asfaltit. Problematike mbeten pjesët ende të paasfaltuara, të cilat janë kthyer në stres për drejtuesit e mjeteve e pasagjerëve. Nëse merr rrugën gjatë këtij aksi, çdokush do të përfundonte në shtëpi i rraskapitur. Shoferët e furgonëve janë të detyruar të ecin ngadalë për të ruajtur jo vetëm pasagjerët, por edhe makinën e tyre. Përballja çdo ditë me baltën apo me pluhurin është një sfidë që ata shpresojnë të përfundojë sa më shpejt. Një tjetër problematikë e punimeve është edhe zgjidhja e kërkesave të katër pronarëve të objekteve, që preken nga ky segment. Deri më tani ata nuk kanë pranuar t'i lëshojnë ato pasi janë të pakënaqur nga çmimi i kompensimit. Superstrada Korçë-Qafë Plloçë, e gjatë 29.16 kilometra filloi të ndërtohet në janar të këtij viti. Ajo financohet nga qeveria shqiptare me 3.2 miliardë lekë
Jorgjeta Gjanci
|
