Universiteti i Korçës do të çelë një degë të Fakultetit Ekonomik edhe në qytetin e Pogradecit. Bëhet fjalë për një degë turizmi, ku pritet të aplikojnë të gjithë studentët e qytetit bregliqenor, të interesuar për të vazhduar studimet e larta si pjesë e universitetit shtetëror të Korçës, i cili do të kryejë edhe diplomimin e këtij kontingjenti të ri. Për faktin se dega e turizmit mbetet një nga më të preferuarat, studentëve të cilët vazhdojnë studimet në qytetin e Korçës do t‘ju shtohet edhe një numër më i lartë gjatë aplikimeve, duke shtuar vendet sipas kërkesës që vjen nga studentët e Rrethit të Pogradecit. Pas nënshkrimit të një marrëveshjeje mes Universitetit të Korçës dhe Bashkisë së Pogradecit, kjo e fundit ka miratuar hapjen e filialit për degën e turizmit. Me një vendim të këshillit bashkiak është aprovuar tashmë ngritja e kësaj strukture, ndërkohë që paraprakisht është vendosur që klasa e parë ku do të studiojnë të rinjtë do të vihet në dispozicion nga ambientet në varësi të bashkisë. Një klasë për studentët e parë të kësaj dege do të çelet në ambientet që disponon bashkia pranë Qendrës Kulturore të Fëmijëve. Fakulteti që do të jetë në varësi të Universitetit të Korçës do të hapet me fillimin e vitit të ri akademik, sipas marrëveshjes mes palëve. Edhe pse nuk është përcaktuar ende se sa do të jetë numri i studentëve të cilët do të pranohen si fillim në këtë degë, sipas të dhënave nga Universiteti i Korçës, ky proces do të jetë gati me nisjen e vitit të ri akademik. Sipas rektorit Gjergji Mero, kjo është një nismë që do të ndihmojë jo vetëm studentët që vijnë nga ky qytet, por edhe për t‘i dhënë një nxitje të mëtejshme turizmit në qytetin bregliqenor. Pas nënshkrimit të marrëveshjes mes dy palëve, sipas Meros, dega e turizmit pritet të nisë së funksionuari me vitin e ri akademik si pjesë e Universitetit të Korçës, me një filial në varësi të tij. Gjergji Mero deklaron se nga ana e Universitetit të Korçës do të vihet në dispozicion edhe personeli akademik që do të shërbejë në këtë filial.
